Baráttudagur gegn einelti í Lágafellsskóla

Fimmtudagurinn 8. nóvember var líflegur í Lágafellsskóla, en þá komu saman allir skólavinir skólans og perluðu saman armbönd, en þessi dagur er helgaður baráttunni gegn einelti og var hann haldinn í áttunda sinn. Nemendur úr 10. bekk fengu skólavini sína úr 5.bekk í heimsókn, 9. bekkur fékk 4. bekk, 3. bekkur heimsótti 8. bekk og í Höfðabergi tóku 1. og 2. bekkingar á móti 6. og 7.bekkingum.

Armböndin sem skólavinirnir perluðu saman voru litrík og falleg og perluðu nemendur ýmis orð sem tengjast vináttu og jákvæðum samskiptum. Gaman var að sjá gleðina sem ríkti og samvinna yngri og eldri nemenda var til fyrirmyndar.

Í ár var leitað eftir hugmyndum frá nemendum og voru margar skemmtilegar hugmyndir sem komu fram, en það voru nemendur í 4-RG sem áttu þessa flottu hugmynd um að allir myndu perla armbönd gegn einelti. Bekkurinn fékk viðurkenningu fyrir bestu hugmyndina (sjá mynd) og vonandi hefur dagurinn vakið nemendur til umhugsunar um þær afleiðingar sem einelti getur haft för með sér.

Sjá fleiri myndir með því að smella hér