Dagur gegn einelti 8.nóv.

Menntamálastofnun vekur athygli á því að 8. nóvember ár hvert er helgaður baráttunni gegn einelti í samfélaginu og er dagurinn nú haldinn í sjötta sinn.  Skólar, félags- og frístundamiðstöðvar, vinnustaðir og landsmenn allir eru hvattir til að hugleiða hvernig við getum stuðlað að jákvæðara samfélagi fyrir alla. Hægt er að minna á daginn með táknrænum hætti og beina umræðunni að einelti og afleiðingum þess í samfélaginu.

Við hér í Lágafellsskóla tókum þátt í deginum með táknrænum hætti. Námsráðgjafar skólans útbjuggu litla pappírsrenninga sem nemendur fengu í hendurnar og skrifuðu þeir það sem þeir töldu sig geta gert til að koma í veg fyrir einelti. Síðan heftuðu þeir blöðin saman svo úr varð ein löng pappírskeðja.

Vert er að rifja upp að árið 2011 undirrituðu fulltrúar stjórnvalda, sveitarfélaga, félagasamtaka og opinberra stofnana þjóðarsáttmála gegn einelti og lýstu þar með vilja sínum til að leggja þessu málefni lið. Ef þú hefur ekki undirritað þjóðarsáttmálann ertu hvattur til að gera það, en með undirritun skuldbindur þú þig til að leggja þessu þarfa málefni lið og stuðla að jákvæðum samskiptum. Sáttmálinn er á vefsíðu fagráðs eineltismála í grunnskólum gegneinelti.is

Allt of mörgum líður illa vegna eineltis og staðreyndin er sú að einelti getur eyðilagt líf og tekið líf. Einelti er þjóðfélagsmein og það er samfélagsskylda okkar að stuðla að því að uppræta það. Einelti þrífst alls staðar þar sem það er látið afskiptalaust. Ef við verðum vör við einelti, leggjum þá okkar framlag á vogarskálarnar, grípum inn í og gerum okkar besta til að beina málinu í réttan farveg. Eitt mikilvægasta vopnið í baráttunni gegn einelti er að samþykkja ekki þöggun.  https://mms.is/frettir/leggjum-aherslu-a-jakvaed-samskipti-dagur-gegn-einelti-2016

Fleiri myndir